Европската унија, САД и другите земји-партнери започнаа огромен железнички и поморски проект што треба да ја поврзе Европа со Блискиот Исток и Индија, изјави во саботата американскиот претседател Џо Бајден на самитот на Г-20 во Њу Делхи.
Претседателката на Европската комисија, Урсула фон дер Лајен, го нарече проектот „историски“, додавајќи дека железничкото поврзување ќе ја забрза трговијата меѓу ЕУ и Индија за 40 отсто, пренесува Тпортал.
Белата куќа претходно во саботата објави дека САД, ЕУ, Индија, Саудиска Арабија и Обединетите Арапски Емирати треба да го усвојат писмото за намери.
Целта на таквиот потфат е „генерирање на економски раст, стимулации за нови инвестиции и напредна регионална интеграција“, рече Џејк Саливан, советник за национална безбедност на САД.
„Сметаме дека самиот проект е храбар и инспиративен, но визијата зад проектот е подеднакво смела и инспиративна“, им рече тој на новинарите на самитот.
Новинскиот портал Аксиос претходно објави дека ова е една од „клучните иницијативи“ на Вашингтон чија цел е да се ограничи влијанието на Кина на Блискиот Исток.
Со иницијативата наречена „Еден појас, еден пат“, Пекинг поддржува инфраструктурни проекти ширум светот, поради што Кина има склучено бројни договори со речиси сите арапски земји.
Иницијативата „Еден појас еден пат“ започната во 2013 година е глобална стратегија за инфраструктура и развој чија цел е поврзување на Азија, Африка и Европа преку мрежа на копнени и поморски трговски патишта.
Тоа беше важна пресвртница во надворешната политика на Кина и стана една од најамбициозните и најдалекосежните развојни иницијативи во историјата.
Западот, а особено Соединетите Држави, го сметаат за не премногу суптилен обид на Пекинг да ги преобликува регионалните политички поредоци во своја полза.
