ЕУ подготвува нови санкции против руската економија

17

Земјите од Европската унија подготвуваат нови санкции за да го зголемат притисокот врз руската економија, соопштија меѓународните агенции.

Европските дејствија ќе се фокусираат на руските банки, повеќе олигарси и употребата на криптовалути, велат дипломатите и претставниците на Брисел.

Европската комисија се очекува следната недела да претстави нов документ за санкциите. Предлогот ќе треба да биде одобрен од сите 27 земји-членки на унијата.

Меѓу мерките за кои моментално разговараат претставници на ЕУ е како да се прошири „црната листа“ на блокот против перење пари, насочена кон земјите кои и помагаат на Русија да ги заобиколи западните санкции.

Потсетуваме дека Соединетите Американски Држави и Европската Унија веќе се договорија да формираат заеднички работни групи за да се осигураат дека санкциите што веќе беа објавени против Русија поради војната во Украина можат ефективно да се спроведат.

Трансатлантските напори вклучуваат работа за да се изврши притисок врз трети земји што им овозможува на руските олигарси и компании да ги преместат финансиските средства надвор од Русија на места надвор од опсегот на западните санкции.

Во моментов, некои западни санкции вклучуваат целосна забрана за сите трансакции со одредени руски државни претпријатија во различни сектори. Забранет е и увозот на производи од челик во ЕУ, при што изгубените приходи за Русија изнесуваат приближно 3,3 милијарди евра.