Fiat Chrysler Automobiles (FCA) е казнет со 299,7 милиони долари поради погрешно прикажување на емисиите на издувните гасови во повеќе од 100.000 дизел возила продадени во САД.
Американската компанија, сега дел од глобалната автомобилска компанија Stellantis, беше осудена во САД откако се изјасни за виновна за криминален заговор во обид да ги измами регулаторите и клиентите – слично на скандалот „Дизелгејт“ на Volkswagen Group пред седум години.
Тригодишната истрага откри дека FCA развил нов 3.0-литарски V6 дизел мотор за Jeep Grand Cherokee и Ram 1500 продадени во САД од 2014 до 2016 година како „чисти екодизел“ возила со најдобра потрошувачка на гориво во својата класа.
Според судските документи, FCA ги калибрирал системите за контрола на емисиите на возилата за да произведуваат помалку емисии на NOx за време на федералните тест процедури, без кои тие немаше да ги поминат тестовите. Погодени се вкупно 101.482 возила.
Дополнително, FCA „се ангажираше во други погрешни и измамнички однесувања“ кои им помогнаа на возилата да ги исполнат потребните стандарди за емисии, се додава во документите.
FCA призна дека го сторил тоа за возилата да ги задржат „карактеристиките што би ги направиле попривлечни за потрошувачите“ во однос на ефикасноста на горивото, интервалите на сервисирање и перформансите.
Покрај тоа, компанијата мора да спроведе ревизија на усогласеноста со Законот за чист воздух на САД, кој потоа мора да ја достави до властите. Потоа мора да подготви уште најмалку два извештаи.
