Постојат 1,4 милиони мигранти кои работат во Катар, мала земја што се простира на Арапскиот полуостров, богата со нафта, а која ќе биде домаќин Светското фудбалско првенство во 2022 година, пренесува Business Insider.
Голем дел од овие мигранти доаѓаат од сиромашни региони од југоисточниот дел на Азија, а работат под архаичен систем наречен калафа, според кој човековите права се поистоветуваат со модерно ропство.
Се проценува дека 4.000 од тие работници ќе починат пред почетокот на Светското првенство што треба да се одржи за осум години.
Американскиот кабелски и сателитски телевизиски канал ESPN го испрати новинарот Џереми Шаап во Катар, од каде се врати со застрашувачки фогографии. Тој посети камп со мигранти сместен во периферијата на Доха, а беше сведок на бедата и лошите услови во кои живеат овие работници.
Овие луѓе се принудени да работат со часови на жешкото сонце. Како резултат на лошите услови за работа, голем е бројот на работници што го губат животот како последица од срцев удар. Амбасадата на Индија во Катар информираше дека 241 работник од нивната земја починал во Катар во 2013 година. Амбасадата пак на Непал, соопшти дека лани во Катар починале 185 работици.
Владата на Катар тврди дека нема ниту една жртва во рамки на проектите за подготовка на земјата за фудбалскиот настан. Земјата има за задача да ја изгради потребната инфраструктура, за која вообичаено се потребни и неколку децении, за да може да ја угости светската фудбалска елита.