Глобалната побарувачка за јаглен во 2025 година се зголеми за 0,5 проценти на годишно ниво, достигнувајќи рекордни 8,85 милијарди тони, но се очекува мал пад до крајот на деценијата поради зголемената конкуренција од други извори на енергија, според извештајот објавен денес од Меѓународната агенција за енергија (ИЕА).
Агенцијата проценува дека до 2030 година, глобалната побарувачка за јаглен ќе се врати приближно на нивото од 2023 година, првенствено поради промените во енергетскиот сектор, кој моментално сочинува околу две третини од вкупната потрошувачка на јаглен.
Според извештајот, постепената експанзија на нуклеарната енергија, силниот раст на обновливите капацитети и значителното зголемување на глобалната понуда на течен природен гас на пазарот ќе доведат до постепен пад на производството на електрична енергија од јаглен веќе во 2026 година.