Хрватска неформално ги отвори своите граници за туристите пред четири дена, пишува загрепски Јутарњи лист, потсетувајќи дека министерот за внатрешни работи Давор Божиновиќ најави дека денеска ќе се донесе одлука за туризмот на ниво на Европската унија.
Весникот пишува дека тоа било навестено вчера, кога Божовиќ на редовната прес – конференција на Штабот за цивилна заштита потврди дека луѓето кои на граница ќе докажат дека имаат резервирано туристичко сместување во Хрватска, всушност може да влезат во земјата без никакви проблеми.
Весникот забележува дека формално-правно тоа е спротивно на препораките на Хрватскиот институт за јавно здравје од 9 мај, со кои се пропишува дека странците можат да ја преминат хрватската граница само во три специфични ситуации и тоа кога во Хрватска имаат недвижен имот или пловило, ако доаѓаат на погреб или се во земјата од деловна причина, односно економски интерес.
Јутарњи, повикувајќи се на неофицијални извори, наведува дека токму туристите спаѓаат во категоријата економски интерес и иако тоа никаде не е децидно наведено, тие всушност можат да влезат во земјата.
Фото: Pixabay
