Најголемиот светски бренд за мебел, IKEA, ги зголемува цените во просек за 9 отсто бидејќи се соочува со зголемени трошоци за транспорт и суровини, изјави во четвртокот сопственикот на Ingka, партнерот кој управува со повеќето нејзини продавници ширум светот.
IKEA работи преку систем на франшиза, при што Ingka е главен франшизист на сопственикот на брендот Inter IKEA со 392 продавници, вклучувајќи ги градските продавници и 73 продавници со помал формат.
Претходно, IKEA соопшти дека ангажира повеќе бродови, купува контејнери и пренасочува стоки меѓу магацините за да ги ублажи нарушувањата во синџирот на снабдување, но сега рече дека треба да ги пренесе трошоците на клиентите бидејќи очекува потресите да продолжат.
Групацијата Ingka соопшти дека цените ќе се зголемат во просек за околу 9% на сите нејзини пазари, при што локалните разлики одразуваат различни инфлациски притисоци, вклучувајќи проблеми со суровините и синџирот на снабдување.
„За жал, сега, за прв пат откако повисоките трошоци почнаа да влијаат на глобалната економија, треба да пренесеме дел од овие зголемени трошоци на нашите клиенти“, рече менаџерот за малопродажба на Ingka, Толга Енчи.
„IKEA продолжува да се соочува со значителни ограничувања во транспортот и суровините што доведуваат до зголемени трошоци, без очекувано нарушување во догледна иднина“, се вели во соопштението на групата, додавајќи дека се очекува прекините да продолжат и во 2022 година.
За време на пандемијата, групата Ingka забележа силна побарувачка бидејќи повеќе луѓе останаа дома.
