Во Нови Сад изминатите две недели се спроведе научно истражување, чијашто цел беше да се процени влијанието на одржувањето на Егзит фестивалот врз ширењето на коронавирусот и степенот на ефикасност на безбедносниот протокол. Прелиминарните резултати покажаа дека фестивалот не бил место за масовна инфекција, соопштија организаторите.
Истражувањето беше организирано од стручен персонал на Здравствен дом Нови Сад и здружението Проект лаб, под раководство на шефот на истражувачкиот тим на епидемиологот Марија Милиќ.
Вкупно 345 испитаници беа поделени во две групи – вакцинирани и оние кои влегоа на фестивалот со негативен тест. Тие биле тестирани пред да влезат на фестивалот, од осми до 10 јули, а само едно лице било позитивно и било спречено да влезе на фестивалот.
Тестирањето се повтори по седум дена, од 15 до 17 јули, а резултатите беа повеќе од охрабрувачки бидејќи и во двете групи, никој не беше позитивен на ковид.
“Со строга контрола на влезот, ваквите резултати од истражувањето беа очекувани. Конечната анализа ќе потрае некое време, но веќе може да се каже, и врз основа на истражување и врз основа на дневниот број на новоинфицирани лица во Нови Сад, дека Егзит не е место за масовна инфекција“, рече директор на Новосадскиот здравствен центар, Веселин Бојат.
Уште еден убедлив доказ дека немало масовно ширење на вирусот на фестивалот е фактот дека дури 10 дена по почетокот на фестивалот немаше значително влошување на епидемиолошката состојба во Нови Сад и дека бројот на позитивни случаи од осми јули до 19 во градот е на ниво на просекот во остатокот од земјата.
Индикатор дека немало масовна инфекција на Егзит се прелиминарните податоци дека од скоро 20.000 странци, на повеќето им требал PCR тест за да се вратат во нивната земја на потекло, само еден бил позитивен, посочуваат организаторите на фестивалот.
Основачот и директор на Егзит, Душан Ковачевиќ, рече дека истражувањето покажува дека дури и за време на пандемија може да се најде начин и модел според кој дури и најмасовните настани можат да се организираат целосно безбедно.
Фото: Facebook
