Ќе се разгледува можноста за зголемување на казните за фирмите кои не исплаќаат минимална плата, по што ќе следат одредени законски измени со кои тоа зголемување би се регулирало, рече денеска министерот за труд и социјална политика, Диме Спасов, пренесува Миа.
“Го разгледавме барањето на синдикатите за зголемување на казните за сите оние кои не исплаќаат минимална плата согласно Законот за минимална плата. Имено, Синдикатот бараше значително поголеми казни. Заедно со Организацијата на работодавачи и со сите членки на Економско – социјалниот совет зазедовме став за определено зголемување на казните кое што набрзо ќе се разгледува на седница на Владата на Република Македонија и потоа ќе излеземе со конкретен став за измени на Законот за минимална плата во насока на посоодветни или, пак, построги санкции за сите оние кои не исплаќаат минимална плата во Република Македонија“, рече Спасов.
Додаде дека и ова барање било разгледано и земено предвид како и сите други барања на синдикатот.
“Барањата на синдикатите континуирано ги разгледуваме. Синдикатот побара измени во Законот за безбедност и здравје при работа. Заедно со Организацијата на работодавачи ги разгледавме и дефиниравме соодветните измени кои ги усвои Економско – социјалниот совет, а потоа и Владата на Република Македонија и сега во моментов се во собраниска процедура измени на Законот за безбедност и здравје при работа кои се во насока на значително зајакнување на улогата на Синдикатот во грижата за безбедноста и здравјето при работа“, рече министерот за труд и социјална политика.
Додаде дека тие измени ќе придонесат и за значително зголемено учество на секој синдикат при сите постапки за спроведување на безбедносните мерки за заштита на работниците.
