Бројот на вработени во Кина се намали за повеќе од 41 милион во последните три години, што ги одразува и ефектите од пандемијата Ковид-19 врз економијата и падот на работоспособното население.
Околу 733,5 милиони Кинези биле вработени во 2022 година, според податоците на заводот за статистика на земјата, а 774,7 милиони луѓе работеле во 2019 година, пишува Блумберг.
Ју Џиадонг, заменик-министер за човечки ресурси и социјална сигурност, во четвртокот рече дека намаленото работоспособно население во Кина е предизвикано од зголемувањето на бројот на пензионери, додавајќи дека Кина има „најголема популација и работна сила од која било земја во развој“.
Стјуарт Гител-Бастен, демограф на Универзитетот за наука и технологија во Хонг Конг, рече дека падот на бројот на работници ги одразува факторите како што се поголемата невработеност кај младите поради пандемијата, како и намалувањето на бројот во „класичната работна возрасна група на работоспособното население“.
Бројот на луѓе во Кина на возраст меѓу 16 и 59 години постепено се намалува од 2012 година. Во текот на изминатите три години, бројот во таа група е намален за 38 милиони на 857,6 милиони, што е многу побрз пад од претходните години.
Лу Фенг, економист за труд на Универзитетот во Пекинг, рече дека демографските промени се „движечкиот фактор“ за падот на вработеноста во 2022 година.
