Во повеќето земји, како во регионот, така и во светот, старосната пензија е 65 години. Меѓутоа, како што се зголемува животниот век, многу земји постепено ја зголемуваат старосната граница за пензионирање.
Во регионот, граѓаните на Македонија во моментов најбрзо стигнуваат до пензија, а најстарите граѓани во Словенија имаат економски најстабилен живот во пензија.
Црна Гора
Мажите во Црна Гора стекнуваат право на старосна пензија на возраст од 65 години и најмалку 15 години стаж на осигурување, додека жените се пензионираат со малку поповолни услови до 2032 година. Моментално за да заминат во пензија им требаат минимум 62 години и девет месеци живот. Планот е да се пензионираат од 2032 година на 64 години и девет месеци.
Во старосна пензија може да оди и црногорски осигуреник кој наполнил 61 година и има 40 години стаж.
Во јули годинава Црна Гора имала 115.644 пензионери, а просечната пензија во јули била 495,13 евра.
Треба да се напомене дека во пракса просечната пензија не претставува вистинска претстава за состојбата на терен. Голем број пензионери добиваат минимални пензии, кои по правило се значително пониски од просечните, додека просекот го подобруваат помал број од оние кои примаат повисоки пензии.
Србија
Во Србија правото на старосна пензија можат да го остварат мажите на 65 години, а жените на 63 и шест месеци, со планирано постепено зголемување на 65 години до 2032 година. За да се пензионираат и на двајцата им треба минимум 15 години стаж. Исто така, и мажите и жените кои имаат 45 години стаж можат да се пензионираат без разлика на нивната возраст.
Во Србија во јули пензија примиле 1.653.687 граѓани, а просечната пензија за седмиот месец годинава изнесува 390 евра (45.709 динари).
Хрватска
Во Хрватска старосната граница за пензионирање и за мажите и за жените е иста како и во Србија. Мажите одат во пензија на 65 години и најмалку 15 години стаж, а жените на 63 години и шест месеци од животот. Планот е да се изедначат условите за пензионирање на мажите и жените во Хрватска од 1 јануари 2030 година.
На старосна пензија може да оди и хрватски осигуреник кој наполнил 60 години и има 41 година стаж.
Во јули годинава во Хрватска живееле 1.227.691 пензионер, а просечната пензија во јули била 581 евро.
Словенија
Во Словенија старосната граница за пензионирање е иста за мажите и за жените. Општи услови за пензија се: 60 години старост и 40 години пензиски стаж или 65 години старост и 15 години стаж на осигурување.
Во јули пензија во Словенија примиле 643.360 граѓани, а просечната пензија била 1.019 евра.
Босна и Херцеговина
Во Федерацијата Босна и Херцеговина услов за пензионирање е 65 години живот и најмалку 15 години стаж. На старосна пензија можеш со 40 години стаж без разлика на возраста. Овие услови важат и за мажи и за жени.
Во јули 2024 година, 450.169 корисници примиле пензија во Федерацијата БиХ, а просечниот износ на пензискиот чек бил 329 евра.
Во Република Српска право на старосна пензија има осигуреник кој наполнил 65 години и има најмалку 15 години стаж на осигурување. Право на старосна пензија има и осигуреник кој не наполнил 65 години, а мора да наполни 60 години и да има 40 години пензиски стаж.
Жените кои немаат 65 години можат да се пензионираат кога ќе наполнат 58 години ако имаат 35 години стаж.
Во Република Српска во јули годинава пензија примиле 286.034 корисници, а просечниот износ на пензијата изнесува 302 евра.
Северна Македонија
Осигуреникот во Северна Македонија има право на старосна пензија кога ќе наполни 64 години ако е маж, или 62 години ако е жена и има најмалку 15 години стаж.
Во јули годинава во Македонија имало 340.482 корисници, а просечната пензија за истиот месец изнесувала 344 евра.
