Македонија, од јануари до август годинава, имаше извоз во вредност од 3,4 милијарди евра, додека во исто време на увоз потроши 4,6 милијарди евра. Намалување има и кај извозот (17,8%) и кај увозот (15,1%) во споредба со осумте месеци од минатата година.
Традиционално, најголеми трговски партнери на земјава ѝ се: Германија, Велика Британија, Србија, Грција и Кина. На прво место е Германија, на чиј пазар завршуваат производи од земјава во вредност од 1,5 милијарди евра. Во истиот период, од Германија е направен увоз во висина од 491,1 милиони евра.
На пазарот на Велика Британија, од јануари до август оваа година, се нашле македонски производи во висина од 97,6 милиони евра, а на увозното “конто“ со оваа земја се прокнижени 625,6 милиони евра.
Од статистичките податоци може да се заклучи дека Македонија има дефицит во трговската размена со соседна Србија, бидејќи извозот е 136,6 милиони евра, додека увозот се позиционираше на 356 милиони евра.
Слична е и ситуацијата со Грција, каде извозот, во периодот јануари – август, достигна вредност од 121,8 милиони евра, а во исто време на увоз потрошивме 292,8 милиони евра.
И Кина се вбројува меѓу нашите најголеми трговски партнери, каде што се извезени македонски производи во висина од 83,4 милиони евра, а увозот надминува 316 милиони евра.
Фото: Pexels