Туризмот во Европската Унија во 2025 година постави нов рекорд со речиси 3,1 милијарди ноќевања во сместувачки капацитети. Ова претставува зголемување од 2,2 проценти, или 66,4 милиони ноќевања повеќе отколку во 2024 година.
Ноќевањата на меѓународните гости се зголемија за 3,4 проценти (+49,7 милиони), додека ноќевањата на домашните гости се зголемија за 1,1 процент (+16,7 милиони), објави Европската канцеларија за статистика – Евростат.
Најмногу ноќевања, 61,7 проценти од вкупниот број во ЕУ, се остварени во четири земји од ЕУ: Шпанија (513,6 милиони), Италија (476,9 милиони), Франција (471,7 милиони) и Германија (442,1 милиони). Спротивно на тоа, земјите со најмал број ноќевања беа Луксембург (3,6 милиони), Латвија (пет милиони) и Естонија (6,7 милиони).
Во 2025 година, бројот на ноќевања од страна на туристите се зголеми во 24 од 27-те земји од ЕУ. Најголем пораст е забележан во Малта (+10,1 процент во споредба со 2024 година) и Полска (7,2 проценти). Спротивно на тоа, намалувања се забележани во Луксембург (-2,4 проценти), Романија (-1,7 проценти) и Ирска (-0,4 проценти).
Во четвртиот квартал од 2025 година, бројот на ноќевања од страна на туристите во ЕУ се зголемил за три проценти во споредба со истиот квартал од 2024 година, а зголемувањето е забележано во 25 земји од ЕУ.
Најголемо зголемување е забележано во Ирска (+12 проценти) и Малта (+10,9 проценти), додека намалување е забележано во Романија (-4,6 проценти) и Луксембург (-0,4 проценти).