Маска го уништува коронавирусот со полнач за мобилен телефон

334

Израелските научници дизајнираа заштитна маска за лице за повеќекратна употреба, којашто може да го убие коронавирусот со топлина, напојувајќи се преку полнач за мобилни телефони.

Дезинфикацискиот процес трае околу 30 минути и корисниците не би требало да ја носат маската додека е приклучена на полначот, предупредува професорот Јаир Еин – Ели, кој го водел научниот тим на Универзитетот Technion.

Новата маска има УСБ порт којшто се спојува со изворот на струја, како и стандардниот полнач за мобилен телефон и го загрева внатрешниот слој од јаглеродни влакна до 70 Целзиусови степени, што е доволно висока температура да ги убие вирусите.

“Беше многу тешко да се најде вистинското јаглеродно влакно коешто ќе ја достигне температурата при вакво излезно напојување од 10 вати на УСБ полначот. Во нашата лабораторија минавме четири дена испитувајќи 40 типови јаглеродни влакна“, вели Еин – Ели.

Според професорот Еин – Ели, маските за еднократна употреба, за коишто имаше голема побарувачка во текот на избувнувањето на пандемијата со новиот коронавирус, не се економични особено за болниците каде што се потребни огромни количества, ниту се добри за природната средина.

Анкетата спроведена од весникот The Washington Post покажала дека околу 66% од анкетираните американски здравствени работници изјавиле дека нивните работни места се соочуваат со недостиг од маски кои се најпогодни за заштита од коронавирус.

“Моравме да изработиме маска којашто е погодна за повеќекратно користење и ова е нашето решение“, вели професорот за новиот изум.

Прототипот наликува на стандардната маска за лице од типот N95, со вентил на предната страна и гумени ленти за зацврстување на маската околу главата.

Научниците го предале патентот за оваа маска во САД кон крајот на март и сега се во преговори за комерцијализација на производот со приватниот сектор. Веројатно ќе се продава по цена за долар повисока од типичните еднократни маски за лице.

Фото: YouTube Printscreen