Нафтената индустрија треба да потроши 542 милијарди долари за да избегне нова криза

18

Годишните трошоци во нафтениот сектор (истражување, дупчење и производство) мора да се зголемат за дури 54% или до 542 милијарди американски долари, ако пазарот сака да спречи евентуален следен шок од недостаток на понуда. Ова се наведува во извештајот на Мудис, цитиран од Оилпрајс.

Компаниите за истражување и производство на нафта и гас беа во најтешка позиција од кој било друг сектор во 2020 година. Меѓутоа, тие сега не инвестираат доволно во снабдувањето за да се избегне друг шок. Компаниите продолжуваат да одржуваат ниски капитални трошоци по падот на цената и кризата во 2020 година, забележува Мудис.

Годишните инвестиции во активности како истражување, дупчење и производство паднаа за околу 30% во 2020 година и слабо закрепнуваат, се вели во анализата на агенцијата. Повеќето производители продолжуваат да се придржуваат кон конзервативните буџети за капитал за 2022 година.

“Нашата анализа покажува дека компаниите ќе треба значително да ги зголемат трошоците на среден рок за да избегнат пад на идното производство“, рече потпретседателот на Мудис, Саџад Алам.

Трошоците се очекува да достигнат 352 милијарди долари оваа година, додека се очекува среднорочна годишна инвестиција да порасне на 542 милијарди долари за да се одржи побарувачката, според Мудис.

Компаниите во секторот ќе мора да трошат значително повеќе, особено ако побарувачката за нафта и гас продолжи да расте.

Побарувачката за нафта се очекува да се врати на нивоата пред пандемијата кон крајот на 2021 година или почетокот на 2022 година. Ова е мислењето на Грег Хил, претседател на американскиот производител на нафта Хес Корп. Сепак, нафтената индустрија не инвестира доволно во снабдувањето, велат експертите во овој сектор.

Минатата година, глобалните инвестиции во секторот паднаа на најниско ниво во последните 15 години од 350 милијарди долари, во споредба со 600 милијарди долари пред пандемијата, според Вуд Мекензи.