Кога размислуваме за преселба во странство, првите асоцијации често се големите и богати земји, високите плати и развиената економија. Сепак, најновото меѓународно рангирање покажува дека големината на земјата не е одлучувачка за квалитетот на животот. На самиот врв се најдоа две мали европски земји, кои зад себе оставија бројни познати светски дестинации, пишува Eуроњуз.
Според истражувањето на Nomad Lifestyle Index за 2026 година, Монако го освои првото место, а потоа Андора. Третата позиција ја освоија Обединетите Арапски Емирати, а меѓу десетте најдобро оценети дестинации дури шест се наоѓаат во Европа.
Истражувањето на Nomad Capitalist опфати 63 дестинации низ целиот свет. Тие беа оценети според пет главни критериуми: квалитет на живот и инфраструктура, безбедност и слобода, природа и клима, даночен систем, како и можностите за престој и пристап.
Трошоците за живот, квалитетот на воздухот, очекуваниот животен век, брзината на интернетот, можноста за стекнување државјанство и изложеноста на екстремни временски настани беа исто така земени предвид.
Монако прв, Андора втора
Првото место на листата му припадна на Монако, кој освои 73,89 поени. Ова мало кнежевство на брегот на Средоземното Море е особено одликувано по квалитетот на живот и инфраструктурата.
Интересно е што Монако е единствената дестинација од истражувањето што доби максимални 100 поени во оваа категорија. Тој постигна и високи оценки кога станува збор за безбедноста и слободата.
Следна е Андора со 73,68 поени. Разликата помеѓу двете првопласирани дестинации е само 0,21 поен.
Оваа мала европска земја особено се издвојува по својата безбедност и слободи, но и по квалитетот на воздухот. Според резултатите од истражувањето, Андора има најчист воздух меѓу европските дестинации вклучени во анализата.
Сепак, постои и една значајна пречка за оние кои би сакале трајно да живеат таму. Патот до државјанство е многу долг, бидејќи натурализацијата бара 20 години престој, заедно со исполнување на дополнителни услови и положување испити по јазик и историја.
Емирати, Малта и Португалија меѓу најдобрите
Третото место го зазедоа Обединетите Арапски Емирати со 73,15 поени. Нивната најголема предност во истражувањето е даночниот систем, што ги прави особено привлечни за меѓународно мобилни поединци и претприемачи.
На четвртата позиција е Малта со 72,11 поени. Оваа островска нација е добро оценета за можноста за престој и пристап, како и условите за стекнување државјанство, под услов да се почитуваат пропишаните процедури.
Петтото место го освои Португалија, која освои 70,09 поени. Особено добри резултати постигна во областите на безбедноста, даночниот систем и можноста за престој.
Сепак, на нејзиниот конечен резултат влијаеше и изложеноста на екстремни временски настани, кои претставуваат сè позначаен предизвик во услови на климатски промени.
Шестото место го зазеде Кипар со 68,42 поени. Оваа земја е добро оценета кога станува збор за можностите за престој, но постигна послаби резултати во категориите квалитет на воздухот, инфраструктура и целокупен квалитет на живот.
Ова се десетте најдобри дестинации за живеење во 2026 година
Според истражувањето на Nomad Lifestyle Index, првите десет места ги зазедоа следниве дестинации:
Монако – 73,89 поени
Андора – 73,68 поени
Обединети Арапски Емирати – 73,15 поени
Малта – 72,11 поени
Португалија – 70,09 поени
Кипар – 68,42 поени
Сингапур – 67,12 поени
Кајмански Острови – 66,50 поени
Нов Зеланд – 66,43 поени
Швајцарија – 65,44 поени
Особено е интересно што дури четири европски дестинации ги зазедоа првите шест позиции.
На листата се најде и Швајцарија, која заврши на десеттото место со 65,44 поени. Иако е позната по високиот животен стандард, безбедноста и развиената инфраструктура, во ова истражување не успеа да се приближи до резултатите на Монако и Андора.