Елиникон, најголемиот паметен град во Европа, моментално се гради во Грција во близина на Атина. Познат е како 15-минутниот град бидејќи сè во него ќе биде оддалечено само 15 минути.
Проектот вреден осум милијарди евра е управуван од компанијата Ламда Девелопмент, а се гради на локацијата каде што порано беше атинскиот меѓународен аеродром, кој беше преместен во 2001 година и работеше од 1938 година.
Во градот ќе биде сместен првиот и највисок облакодер во Грција и најголемиот трговски центар, со повеќе од 300 продавници, а пистата на стариот аеродром ќе биде претворена во парк.
Работата започна во јуни 2021 година, а само шест месеци по почетокот беше завршен првиот дел од Паркот Елиникон, кој по завршувањето ќе стане најголемиот крајбрежен парк во Европа. Ќе се простира на два милиони квадратни метри. Во паркот ќе има повеќе од 31.000 дрвја и повеќе од еден милион растенија.
Целиот проект започна во 2013 година, а се очекува да биде завршен во 2037 година. Експертите проценуваат дека ќе биде значаен за грчката економија со привлекување околу еден милион странски посетители годишно, што ќе обезбеди дополнителни 14 милиони евра приходи.
„Тоа е цел сопствен град со станови, ресторани и образовни и малопродажни објекти, исто како што би имале во традиционален град, само овој град е целосно одржлив. Луѓето ќе возат велосипеди, ќе пешачат, бидејќи сè е во рок од 15 минути или ќе одат до град со јавен превоз, наместо да возат автомобили, иако сите станбени единици имаат паркинг. Со текот на времето овде ќе има простор за живеење и работа за повеќе од 25.000 луѓе, што стана уште поважно по трендот на работа на далечина. До 2026 година, жителите ќе почнат да се вселуваат во своите нови домови“, рече Одисеас Атанасиу, главен извршен директор на Lamda Development.
Во 2022 година е отворен Ellinikon Experience Center, пренесува Designboom.com, каде посетителите можат да дознаат повеќе за проектот, а сите заинтересирани можат да резервираат разглед на центарот.
Многу станбени зони во новиот град веќе се продадени, што е знак за голем интерес за живеење во иднина.
„Продажбата на недвижен имот изнесува повеќе од 600 милиони евра и се очекува оваа бројка да се зголеми“, рече Атанасиу.
Во изградба е и Ellinikon Commercial Hub, кој ќе стане најголемиот малопродажен, забавен и деловен комплекс во Грција и еден од најголемите во јужна Европа, пишува Forbes, со повеќе од 185.000 квадратни метри.
