Доаѓа момент, узурпираните институции, кои системски беа уништувани со години, сега да влезат во еден процес на реорганизација на трансформација и на целосен сервис кон граѓаните, изјави заменик-претседателот на Владата задолжен за борба против корупцијата и криминалот, одржлив развој и човечки ресурси, Љупчо Николовски, во емисијата Економски магазин, на телевизијата АлсатМ.
При тоа, вицепремиерот Николовски посочи дека преку неговата функција којашто е координативна веќе се воспоставува пракса на редовна и тековна поддршка на институциите кои треба да се борат против корупцијата, а кои досега можеби немале или имале слаба комуникација. Николовски истакна дека координацијата и соработката на сите надлежни институции значително ќе се зајакне, а со тоа и борбата против корупцијата и криминалот.
“Ние не можеме да зборуваме за борба против корупција и инвестиции, кога ние имавме многу покрупни проблеми од кои зависеше опстанокот на државата. Имавме еден режим којшто ги сруши сите институции и сега ние почнуваме од минусно салдо, да работиме нешто што треба другите генерации да го сработат. За две години станавме членка на НАТО, ги решивме сите крупни проблеми, добивме одлука за почеток на преговорите со Европската Унија, и добро е што денеска во сите извештаи зборуваме за борба против корупцијата и приоритетите и она што ни се поставува како задачи се токму овие теми кои се значајни за граѓаните, за да се врати довербата во системот, за да постои ред, дисциплина, за да постои правда во сите области, не е тоа само нешто во судството, туку да ги доведеме во ред работите и да профункционираат институциите. Затоа беше потребата од една координитивна улога во овој период којашто сега се воспоставува“, изјави вицепремиерот Николовски.
Воедно, вицепремиерот потенцираше дека дел од приоритети се кратење на сите дискрециони права, бенефиции и привилегии, кои што ги имаат функционерите, потоа измени во целокупното кривично законодавство, кратење на непродуктивни трошоци.
Во делот на извештаите од Државниот завод за ревизија, Николовски посочи дека досега нема податок некој функционер да е разрешен врз основа на ревизорски извештај.
“Не се сеќавам и не најдов податок дека досега некој функционер е разрешен врз база на ревизорски извештај од Државниот завод за ревизија, а ако отворите некој од нив ќе видите дека не се имплементирани ниту препораките, она што им е обврска на раководните структури во рок од три, шест месеци да го направат. Ги гледаме и ги констатираме сите слабости во системот, неповрзаноста, некоординираноста, и како вицепремиер ќе бидам тука да помогнам, но не како паралелен систем“, изјави вицепремиерот Николовски, додавајќи дека автономноста на институциите од извршната власт, но и цврстите регулаторни тела треба да се јакнат и ќе ја добијат целокупната поддршка да работат на чесен и одговорен начин со многу храброст и енергија, сите заедно, од сите политички структури.
Фото: Pixabay
