Оваа недела во Кина стапија на сила новите правила поврзани со содржината генерирана од вештачката интелигенција. Според новите правила, при креирањето на содржината, вештачката интелигенција мора да се придржува до „фундаменталните вредности на социјализмот“ и не смее да ја загрозува националната безбедност, да промовира насилство и етничка омраза.
Давателите на генеративни услуги за вештачка интелигенција мора соодветно да ја означат содржината генерирана од вештачката интелигенција, а при дизајнирање алгоритми мора да преземат мерки за да се спречи дискриминација врз основа на пол, возраст и раса, пишува француската новинска агенција АФП.
Вештачката интелигенција не смее да создава содржина што содржи лажни или штетни информации. Во исто време, при креирањето на програма за вештачка интелигенција, не смее да се повредува туѓата интелектуална сопственост.
Пекинг бара од компаниите кои создаваат јавно достапен софтвер за генеративна вештачка интелигенција да преземат ефективни мерки за да спречат малолетните корисници премногу да се потпираат или да станат зависни од генеративните услуги за вештачка интелигенција.
Меѓу другото, мора да воспостават механизми за пријавување несоодветна содржина и веднаш да ги избришат нелегалните содржини.
Експертите веруваат дека новите правила се малку поблаги од многу построгите нацрт-правила што Пекинг ги објави претходно оваа година. Така, првично беше предложена казна од 100.000 јуани (12.600 евра) за прекршоци, но според новиот закон, прекршителите ќе добијат предупредување, а построга казна само во случај на прекршување на вистинските закони.
Според проценките на експертите, Кина сака да го поттикне процутот на индустријата за вештачка интелигенција на домашна почва со малку благи правила, наведува АФП. Водечка улога во областа на вештачката интелигенција моментално ја имаат САД, од каде што доаѓаат алатките како ChatGPT и Bard.
