Објавен огласот за субвенционирање на вработувањата за 2014 година

Агенцијата за вработување денеска го објави огласот за субвенционирано вработување на млади лица до 29 години, кој е дел од Оперативниот план за активни програми и мерки за вработување за 2014 година.
Со огласот ќе бидат опфатени дипломираните млади лица до 29 години кои завршиле високо образование во студиската 2012/2013 година. За реализација на оваа владина мерка ќе бидат одвоени еден 1.170.000 денари од Буџетот на Република Македонија.
Субвенционирањето ќе биде по моделот 3+6, кој предвидува три месеци субвенционирано вработување со полно работно време и шест месеци обврска на работодавачот да го задржи лицето на работа или на негово место да вработи друго невработено лице. Овие лица ќе примаат месечна бруто плата од 13.000 денари.
“Околностите наметнуваат постојано да се размислува за нови начини со кои за секоја категорија на невработени лица ќе се отвораат можности за вработување. Не постојат инстант решенија ниту еднократно решение на овој долгорочен проблем. Но, наша задача е системски да ја намалиме невработеноста, а невработените лица да вложуваат во себе постојано и да ги прифаќаат можностите што им ги нуди државата”, истакна министерот за труд и социјална политика Диме Спасов.
Покрај ова, денеска се објавени и огласи за обука кај познат работодавач со субвенционирано вработување и обука за занимањата кои се бараат на пазарот на трудот од сообраќајната струка.
Со огласот за првата мерка ќе бидат опфатени околу 170 лица, активни баратели на работа на возраст од 50 до 59 години, млади лица до 29 години со завршено основно или средно образование и долгорочно невработени лица. За реализација на мерката одвоени се 9.537.000 денари од Буџетот на Република Македонија.
Обуката ќе трае до три месеци, а работодавачот ќе има обврска да вработи со полно работно време најмалку 50% од оние кои ќе бидат вклучени во обуката. Невработеното лице ќе зема месечен надоместок од 5.700 денари со вклучено осигурување во случај на несреќа при работа и професионално заболување. По завршувањето на обуката, ќе биде обезбедена субвенција за бруто плата на невработеното лице во висина од 13.000 денари, а работодавачот ќе мора да го задржи на работа во следните 12 месеци додека трае субвенцијата или на негово место да вработи друго невработено лице.
Со обуката за занимања од сообраќајната струка ќе бидат опфатени 30-тина лица кои ќе се стекнат со правото да полагаат возачки испит за Д категорија, односно за автобус по што ќе имаат можност да се вработат кај превозници кои имаат потреба од ваков кадар.
Директорот на Агенцијата за вработување Влатко Поповски истакна дека се работи за пилот мерка и оти во зависност од интересот на невработените и на работодавачите ќе се види дали ќе биде проширен опфатот.
Досега во Агенцијата за вработување се регистрирани 97.852 активни и 122.940 пасивни баратели на работа.