Втора година по ред најголем број на поплаките на потрошувачите се однесуваа на проблеми во остварување на правата од гаранцијата и гарантниот лист на техничките производи, а особено мобилните телефони, покажуваат податоците на Организацијата за заштита на потрошувачи (ОПМ).
“Овој проблем изнесува околу 13% од вкупниот број на проблеми за кои ги советувавме потрошувачите и сметаме дека е потребна детална анализа за препознавање на причината за големиот број на проблеми во овој домен и изнаоѓање на решение за намалување на бројот на проблеми со кои се соочуваат потрошувачите при остварување на правата од гаранција и гарантен лист кога производот е мобилен телефон“, се вели во соопштението.
Потрошувачите велат дека и кога кај производот ќе појави недостаток во првите 24 часа, тие се принудени да го пратат на сервисирање, поради тоа што трговците одбиваат да им издадат нов. Почесто се случува потрошувачите да добијат одговор од сервисот дека производот им е механички оштетен и да им биде прекината гаранцијата и покрај тоа што во повеќето случаи потрошувачите тврдеа дека нема никакво механичко оштетување на производот.
Во однос на другите производи, почесто се случува потрошувачите да се пожалат на проблем при сервисирање на одредени мали кујнски производи, блендери, миксери итн. Тие велат дека и покрај тоа што тие производи го имаат најкусиот законски утврден рок од шест месеци, тие често се расипуваат и во првите два месеци, по што следат континуирани сервисирања кои скоро секогаш траат по 30 дена.
“Апелираме до потрошувачите, во вакви случаи да бараат продолжување на гарантниот рок, поради тоа што согласно Законот за заштита на потрошувачите, гарантниот рок на производот се продолжува за онолку време колку што истиот е даден на сервисирање. Потрошувачите секогаш мора да бараат да им биде даден сервисен налог со точни датуми на предавање и примање на производот, што е единствен доказ за извршеното сервисирање“, велат од ОПМ.
Во однос на производите од домот, голем број на поплаки од потрошувачите се за изработка на мебел и покуќнина. Најчести проблеми со кои се соочуваат потрошувачите во овој домен е пречекорување на договореното време за изработка и достава на мебелот, како и неквалитетна изработка на мебелот, скриени недостатоци кои не можат да се откријат на прв поглед и сл. Поради тоа што се работи за производ кој е наменет за секојдневна употреба и тежок за транспорт, поправањето на овој вид на производ претставува голем проблем кај потрошувачите, особено кога тоа треба да се прави повеќе од еднаш.
Во доменот на производи за лична употреба потрошувачите имаа проблеми со обувки и облека, односно неквалитетни производи кои тие ги купуваат и се оштетуваат после неколку дневно носење. Сервисирање на овие производи е често невозможно, односно се работи за недостаток којшто не може да се отстрани (на пр. избледување на облека, луштење на кожата на чевла итн.). Потрошувачите велеа дека обувките кои ги купиле им предизвикуваат осипи или дека чувствуваат болки при носење. Во овие случи и покрај тоа што потрошувачите бараат замена за друг производ, тие многу тешко тоа го добиваат, додека пак враќање на средствата не се прави речиси никогаш.
Туристичките патувања се најбројни во доменот на услугите кои се нудат на потрошувачите, сепак со помал број во однос на лани.
“Сепак сметаме дека помалиот број на жалби не значи дека постојат помал број на проблеми кај потрошувачите, туку дека повеќето потрошувачи веќе ја знаат постапката за остварување на своите права во овие случаи и го користат правото за поднесување на приговор до туристичката агенција во рок од осум дена од денот кога се вратени од патувањето. Најчест проблем беше неисполнување на одредени делови од понудите, односно договорите на потрошувачите со туристичката агенција за одредено туристичко патување“, соопштуваат од ОПМ.
Во периодот од 2015-тата година советодавните бироа на Организацијата на потрошувачите на Македонија извршија 2.697 советувања, од кои 1.575 беа направени во советодавното биро на ОПМ во Скопје, а останатите 1.122 беа направени во локалните советодавни бироа лоцирани во Тетово, Кочани, Штип, Битола и Охрид. Од вкупниот број на советувања, 2.530 беа општо правни, а 167 специјалистички (каде што спаѓаат проблемите со храна, финансиски услуги, домување и правата на пациенти). Најголем дел од советувањата беа дадени по пат на телефон, па потоа по електронска пошта и во најмал број лично или писмено по пошта.
