Нова меѓународна анализа открива кои европски земји се најпаметни, со комбинирање на резултатите од PISA тестовите, бројот на научни публикации и просечниот коефициент на интелигенција на населението. На врвот на листата е Швајцарија, додека Естонија и Финска водат во образованието, а Обединетото Кралство и Германија во истражувачки резултати.
Со децении, Европа е синоним за квалитетно образование, иновации и научни достигнувања. Сепак, нова меѓународна анализа открива дека некои земји водат во речиси сите сегменти – од интелигенција до научен и економски напредок.
Според извештајот на платформата TradingPlatforms, Швајцарија е најпаметната земја во Европа и трета во светот, со вкупен резултат за „паметност“ од 72,2 поени од 100. Оваа позиција се базира на висок просечен коефициент на интелигенција (100,8) и импресивен истражувачки резултат – дури 3.967 научни публикации во 2024 година, односно 442,4 по глава на жител.
На второ место е Исланд (59,1/100), благодарение на исклучителниот број научни трудови по жител, додека Данска е трета (57,9/100).
Финска со просечен коефициент на интелигенција од 100,3 и одлични резултати на PISA (495) го зазеде четвртото место, а Естонија се издвои како земја со најдобар образовен систем во Европа, со просек од 516 PISA поени – највисок на континентот.
Шведска, Словенија, Холандија, Австрија и Обединетото Кралство се исто така во првите 10, што комбинира висока научна продукција и солидни образовни резултати.
Германија е лидер по вкупниот број научни публикации (10.559), но не и по квалитетот на образовните резултати, додека Шпанија изненади со највисокиот просечен коефициент на интелигенција во Европа – 102,3.
„Земјите со повисок просечен коефициент на интелигенција генерално постигнуваат подобри образовни резултати и посилен научен продукт. Помалите земји како Швајцарија, Естонија и Финска покажуваат дека не е важна големината, туку инвестициите во образованието и истражувањето“, вели аналитичарот Мартин Тунчев од TradingPlatforms.