На Wall Street во средата, цените на акциите паднаа нагло, трет ден по ред, поради стравот дека големиот раст на бројот на пациенти со коронавирус ќе доведе до сериозни ограничувачки мерки, а со тоа и ќе го забави закрепнувањето на светската економија.
Индексот Dow Jones потона 943 поени или 3,43% на 26.519 поени, што е најниско ниво од крајот на јули, додека S&P 500 се лизна за 3,53%, на 3.271 поени, а индексот Nasdaq 3,73%, на 11.004 поени.
Најголемиот дневен пад на индексите Dow и S&P 500 од средината на јуни се должи на силниот раст на бројот на нови инфекции со коронавирусот во светот, особено во САД и Европа.
Рекорден број хоспитализирани пациенти Ковид-19 се пријавени во 12 сојузни држави во САД, додека Германија и Франција објавија дека планираат да затворат голем дел од јавниот живот за еден месец поради немилосрдното ширење на коронавирусот.
Вчера најмногу паднаа цените на акциите во угостителството, авио и другите сектори поврзани со туризмот, што е многу чувствителен на состојбата со коронавирусот.
Индексот на авиосекторот во S&P 500 падна за 4,3%, следен од енергетскиот сектор, со просечен пад од 4,2%, како резултат на наглиот пад на цената на нафтата, поради стравувањата на инвеститорите од продлабочување на корона кризата.
Акциите во технолошкиот сектор, исто така, се намалија во просек повеќе од 4%.
Фото: Pixabay