На Волстрит, индексите на берзата паднаа во четврток поради притисок врз акциите на инвестициските компании, но и поради падот на цените на неколку технолошки гиганти, како што се Nvidia и Apple.
Дау Џонс изгуби 0,54 проценти, на 49.395 поени, додека S&P 500 се лизна за 0,28 проценти, на 6.861 поен, а индексот Nasdaq 0,31 процент, на 22.682 поени.
Акциите на инвестициските компании беа под најголем притисок вчера, откако Blue Owl Capital објави одлуки за продажба на средства во вредност од 1,5 милијарди долари и замрзнување на откупот на акции во еден од своите фондови во обид да го подобри управувањето со долгот и повратот на капиталот.
Цената на акциите на таа компанија потона за 6 проценти. Цените на акциите на „Блекстоун“ и „Аполо Глобал Менаџмент“ исто така нагло паднаа, за повеќе од 5 проценти, а акциите на другите компании за приватен капитал исто така беа коригирани бидејќи проблемите на „Блу Аул“ предизвикаа загриженост за квалитетот на нивните кредити и изложеноста на акции на софтверски компании.
И откако пораснаа претходниот ден, цените на акциите на неколку технолошки гиганти, како што се Nvidia и Apple, вчера повторно паднаа.
Акциите на компаниите што развиваат вештачка интелигенција (ВИ) значително флуктуираа во последните месеци поради досега скромните докази дека огромните инвестиции во развојот на ВИ носат раст на приходите и профитот.
Неодамна, акциите на голем број други компании, почнувајќи од софтвер до логистика, беа под притисок, бидејќи развојот на вештачката интелигенција би можел да ги наруши нивните бизнис модели и да ја засили конкуренцијата.
„Пазарот се обидува да открие кои деловни сектори се материјално загрозени од вештачката интелигенција. Оваа технологија се развива екстремно брзо и деновите како денешниот се сосема нормални. Во оваа фаза од циклусот, инвеститорите сфаќаат дека нема сите да победат и дека нема да бидат исполнети сите очекувања“, вели Кит Бјукенен, аналитичар во „Глобалт Инвестментс“.