Фармацевтскиот гигант Pfizer се согласи да ја купи Global Blood Therapeutics Inc. за 5,4 милијарди долари.
Pfizer соопшти дека ќе плати 68,50 долари по акција во готовина за Global Blood Therapeutics, која има еден од ретките одобрени третмани за српеста анемија, објави Wall Street Journal.
Оваа аквизиција е уште една во низата каде Pfizer, како што пишува весникот, ги инвестира парите што ги има од продажбата на вакцини и лекови против Ковид-19. Планот на компанијата е да додаде 25 милијарди долари приход до 2030 година како резултат на развој на бизнисот, кој вклучува спојувања и превземања.
Додавањето на Global Blood Therapeutics ќе го зајакне портфолиото на компании за ретки болести на Pfizer, но и ќе и помогне да ја постигне својата долгорочна цел за продажба на лекови за лекување на српеста анемија, наследно нарушување на крвта што погодува околу 100.000 луѓе во САД и 20 милиони ширум светот. Pfizer се обиде да развие сопствен лек, но не успеа.
Во 2019 година, Global Blood Therapeutics доби одобрение за лек за српеста анемија наречен Oxbryta, а во моментов има уште два лека за болеста во развој.
Oxbryta генерираше 195 милиони долари во нето продажба минатата година за Global Blood Therapeutics, со седиште во Јужен Сан Франциско, Калифорнија.
