Преговорите за влез на уште еден партнер во сопственичката структура на Монтенегроберза се во тек и се усогласуваат потребните договори.
Извршниот директор на Монтенегроберза, Гојко Максимовиќ, во интервју за Дан вели дека поради усогласување на акционерските и договорите за продажба, се уште не можат да прецизираат конечни рокови по прашањето за реализација на наведениот проект, пренесува Вијести.
Максимовиќ смета дека се уште не е доволно искористен влезот на Истанбулската берза во Монтенегроберза за поврзување и приближување на црногорскиот пазар на капитал со турските инвеститори.
Истанбулска берза во декември минатата година купи 24,38% од акциите на Монтенегроберза за 450.000 евра, а мнозински сопственик и понатаму остана Атлас група.
Турците имаат удел и во Сараевска берза. Борса Истанбул е меѓу водечките во светот по дневен обрт. Дневната вредност на прометот на овој пазар е 1,7 милијарди долари, а пазарната капитализација на акции на берзата изнесува 280 милијарди долари.
