Македонска берза во мај оствари промет од 391.797.251 денари, што во споредба со претходниот месец, кога беше на ниво од 146.670.828 денари, значи пораст од 118,04%, покажува месечниот статистички билтен, објавен на Берзата.
Пазарната капитализација во мај изнесува 94.582.162.109 денари, што исто така претставува зголемување од 1,59% во однос на претходниот месец, кога таа беше на ниво од 93.099.803.295 денари.
Раст забележуваат и вкупниот број на трансакции – 1.366 за 58,29% и индексот МБИ10 за 4,57%.
Најтргувани акции на официјалниот пазар беа оние на Комерцијална банка кои во вкупниот промет учествуваа со 38,87%, потоа веднаш зад нив се хартиите од вредност на Алкалоид со 222 трансакции или 28,49% учество во вкупниот промет. Трети најтргувани акции во мај беа оние на Макпетрол со 113 трансакции односно 10,12% учество во вкупниот промет на официјалниот пазар.
Најголем пораст забележаа акциите на Агро Куманово од Куманово – 124,44%, додека зад нив беа хартиите од вредност на Хотели Метропол од Охрид со раст од 39,32%. На третата позиција најтргувани акции беа оние на РЖ Услуги со пораст од 36%.
Таканаречени “губитници“ во мај, односно акции што забележаа најголем пад беа хартиите од вредност на МЗТ Пумпи за 44,29%, ЕМО Охрид со пад на вредноста од 35,48%. Акциите на Осигурување Македонија АД Скопје – Виена Иншуренс Груп завршија 25% во минус.
