Министерството за здравство го повлекло авансот што беше уплатен за набавка на вакцини од кинескиот производител Sinopharm, но договорот за нивната набавка не е откажан.
Од Министерството за здравство за МИА велат дека уплатата била повлечена на барање на кинеската страна поради усогласување на документацијата.
“Авансната уплата која Министерството за здравство ја изврши за набавка на вакцината Sinopharm, по барање на кинеското Министерство за надворешни работи беше повлечена заради усогласување на документација, на нашето МНР и МНР на НР Кина. Разговорите се во завршна фаза, не станува збор за откажување на договорот, вакцините против Ковид 19 од производителот Sinopharm во најкус можен рок ќе стигнат во нашата земја“, наведуваат од Министерството за здравство.
Северна Македонија треба да добие 200 000 илјади вакцини од кинескиот производител Sinopharm. Покрај очекуваните количини преку системот Ковакс, во тек се разговори за набавка и на 100 илјади дози од руската Спутник V, како и вакцини од Pfizer.
Министерот за здравство, Венко Филипче вчера при посетата на Гостивар изрази уверување дека во следните неколку денови ќе може точно да каже кога ќе пристигнат кинеските и руските вакцини против Ковид–19.
“Не би сакал сега да шпекулирам, сакам да бидам прецизен тогаш кога точно ќе знаеме кога ќе пристигнат. Се пролонгираше малку периодот. Очекувам сите овие разговори да завршат за што пократко време. Секојдневно има нови прашања од компаниите, тоа важи за сите компании. Од Pfizer за којшто го очекуваме драфт договорот. Со руската компанија интензивно разговараме овие денови после потпишувањето на договорот и секако со кинеската“, изјави министерот Филипче.
Во земјава досега пристигнаа само 8.000 вакцини Pfizer преку Србија со кои се имунизираат здравствените работници.
Фото: Facebook
