Проектот Учиме од бизнис заедницата стартува по четврти пат

22

Започнува четвртиот циклус од Владиниот проект Учиме од бизнис заедницата, преку кој планирани се посети на најмалку 150 компании.

Огласот за компании кои сакаат да учествуваат во овој проект денес е објавен во дневниот печат и ќе трае до 5 октомври.

Заменик-претседателот на Владата задолжен за економски прашања, Владимир Пешевски на денешната прес – конференција информираше дека ефектот на реализација во првите два циклуси е доста голем, односно над 50% од барањата се реализирани.

“Главниот бенефит од овој проект се препознава токму во тоа што голем дел од иницијативите и предлозите на бизнис заедницата допринесуваат во креирање на економските политики на Владата. Имено искуствата покажуваат дека токму врз барањата на бизнис заедницата, донесени се нови стратегии, имплементирани се низа проекти и направени се измени во голем број на закони”, изјави Пешевски.

Вицепремиерот додаде дека проектот овозможува директна комуникација помеѓу Владата и бизнис заедницата.

“Преку директни посети и разговори со компаниите од страна на обучени тимови Владата директно се запознава со предизвиците и проблемите со кои се соочуваат македонските компании во секојдневното работење”, појасни Пешевски.

Посетените компании се од различни области, претежно од металуршката, метало-преработувачката, градежната, хемиската, прехранбената, текстилната, фармацевтската, дрвната индустрија, како и компании од услужниот сектор, претежно од трговија, угостителство и туризам.

Проектот Учиме од бизнис заедницата започна да се спроведува кон крајот на 2010 година, а во изминативе три години посетени се над 400 компании во 34 градови во државата.