Компании како „Фолксваген“, „БМВ“ и „Мерцедес-Бенц“ неодамна издадоа предупредувања за профит, бидејќи продажбата е под притисок, особено во Кина. Извозот на германски возила во Кина се намали за две третини од 2022 година, според податоците од статистичката агенција на ЕУ, Евростат. Ривалството, кое се прошири од производството на автомобили во други индустриски сектори, е видливо во пошироките трговски перформанси на Германија. Минатата година, извозот на стоки во Кина се намали за 9,3% на 81,8 милијарди евра (97 милијарди долари), најниско ниво во последната деценија, додека кинескиот увоз се зголеми, пишува Ревија ХАК.
– Германија е во центарот на вториот кинески шок – изјави за ДВ Ендру Смол, директор на азиската програма во Европскиот совет за надворешни односи (ECFR).
– Двете економии порано се надополнуваа; сега функционираат како конкуренти.
Овој месец, „Родиум груп“, истражувачка куќа со седиште во Њујорк специјализирана за Кина, предупреди дека надворешната трговија на Германија со Кина влезе во структурен пад и дека доколку индустријата не најде алтернативни пазари, бранот на банкроти и намалување на работните места што го сведочи Германија веројатно ќе се забрза. Родиум апострофираше дека кинеските конкуренти земаат пазарен удел од германските производители на машини, хемикалии и системи за производство на енергија.
– Кинескиот пазар порано беше златен рудник за германските мултинационални компании – рече Ноа Баркин, коавтор на трудот и виш советник на Родиум за Кина. – Но, во последните три години, една четвртина од германскиот извоз во Кина исчезна.
Со години, Кина беше најголемата или втората најголема извозна дестинација на Германија, но во 2024 година падна на петтото место. Но, германскиот извоз во Кина не е единствениот проблем, проблемот е што кинеските производители сега ги загрозуваат германските производители на други пазари со извоз. Најдобар пример е автомобилската индустрија. Кинеските производители се шират низ целиот свет, вклучително и во Европа…