Министрите за надворешни работи на ЕУ во понеделникот не се согласија околу тоа дали и како да воведат санкции врз профитабилниот енергетски сектор на Русија поради нејзината инвазија на Украина, при што Германија рече дека блокот е премногу зависен од руската нафта за да одлучи за ембарго.
ЕУ и сојузниците веќе воведоа мерки против Русија, вклучително и замрзнување на нејзините средства од централната банка.
Но, таргетирањето на руската нафта, како што направија Соединетите Американски Држави и Велика Британија, предизвика поделби во блокот од 27 нации, кој се потпира на Русија за 40 отсто од својот гас. Некои во понеделникот тврдеа дека ЕУ повеќе не може да избегне таков потег.
„Гледајќи ги сегашните размери на уништувањето во Украина, многу е тешко да се тврди дека не треба да се занимаваме со енергетскиот сектор, особено со нафтата и јагленот“, рече ирскиот министер за надворешни работи Сајмон Ковени пред средбата со колегите, повторувајќи ги коментарите од балтичките земји.
Но, Германија и Холандија рекоа дека ЕУ е зависна од руската нафта и гас и тоа не може да се промени за еден ден.
„Прашањето за ембаргото за нафта не е прашање дали го сакаме или не, туку прашањето колку зависиме од нафтата“, изјави пред новинарите германската министерка за надворешни работи Аналена Бербок.
„Германија увезува многу (руска нафта), но има и други земји-членки кои не можат да го запрат увозот на нафта за еден ден. Кога би можеле, би го направиле тоа автоматски“, рече таа, додавајќи дека блокот наместо тоа треба да работи на намалување на зависноста од Москва за нејзините енергетски потреби.
Дипломатите предупредија дека енергетиката е еден од најкомплексните сектори за санкционирање бидејќи секоја земја од ЕУ има свои црвени линии. „Санкциите се експоненцијални“, рече еден дипломат. „Колку подалеку одите, толку е потешко да ги усвоите.“ Дипломатите рекоа дека нападот со руско хемиско оружје во Украина или тешкото бомбардирање на главниот град Киев може да биде поттик за енергетско ембарго.
Тие рекоа дека додека некои земји сакаат ембарго на нафта, Германија и Италија, кои зависат од рускиот гас, се откажуваат поради и онака високите цени на енергијата. Санкциите за јаглен се црвена линија за некои, вклучувајќи ги Германија, Полска и Данска, додека за други, како што е Холандија, нафтата е недопирлива.
Самата Москва предупреди дека таквите санкции би можеле да ја поттикнат да го затвори гасоводот кон Европа.
На состанокот на министрите за надворешни работи, прв во напорната недела разговори во Брисел, не се очекуваше одлука за потенцијални енергетски санкции.
Кремљ досега не беше поттикнат да го промени курсот во Украина поради санкциите од ЕУ.
Петтата рунда санкции ќе вклучи повеќе имиња на црните листи на ЕУ.
Одделно, министрите за одбрана се очекува во понеделник да разговараат за новата воена стратегија „стратешки компас“ за прилагодување на ЕУ на променливата геополитичка реалност. Документот беше изменет со цел да се зајакнат деловите поврзани со Русија, рече претставникот на ЕУ.
