Саудиската компанија „Мидад енерџи“ се појави како еден од водечките кандидати за купување на меѓународните средства на руската нафтена компанија „Лукоил“, искористувајќи ги добрите односи на официјален Ријад и со Москва и со Вашингтон.
Вредноста на меѓународните средства на „Лукоил“ се проценува на околу 22 милијарди долари, а вклучува нафтени полиња, рафинерии и илјадници бензински пумпи низ целиот свет. Во моментов, како што објави „Ројтерс“, интерес за „Лукоил“ имаат околу десетина компании, вклучувајќи ги големите американски нафтени компании „Ексон Мобил“ и „Шеврон“ и глобалната инвестициска компанија „Карлајл“.
САД воведоа санкции за Лукоил и Роснефт во октомври и оттогаш го продолжија рокот за нивно стапување во сила во два наврати, т.е. отворија простор за наоѓање купувач за меѓународните средства на Лукоил во меѓувреме.
Лукоил е присутен во три европски рафинерии лоцирани во Холандија, Романија и Бугарија. Присутен е во Хрватска преку синџир бензински пумпи.
Мидад Енерџи, Лукоил и Министерството за финансии на САД не сакаа да ги коментираат информациите за интересот на саудиската компанија.
Неодамна, Мидад Енерџи во Алжир потпиша договор вреден 5,4 милијарди долари за истражување и експлоатација на нафта и гас во таа земја.
Економската соработка меѓу Саудиска Арабија и САД видливо се интензивираше со доаѓањето на Доналд Трамп во Белата куќа. Двете земји постигнаа голем број економски договори оваа година, а Ријад најави инвестиции до една милијарда долари.
„Мидад енерџи“ има намера целосно да ги плати средствата на „Лукоил“ во готово, а парите ќе се чуваат на посебна сметка додека не се укинат санкциите против Русија.