Западните санкции не ја осакатија руската економија, но нафтената индустрија се соочува со проблеми од секундарните санкции, кои предизвикуваат загриженост кај глобалните банки, од кои некои се повлекуваат од водење бизнис со Русија.
Гувернерката на Банката на Русија, Елвира Набиулина, објави дека построгите санкции на Западот штетат на приходите на Москва од извозот на нафта. „Санкциите дефинитивно создаваат тешкотии при прекуграничните плаќања“, рече таа, пренесе ТАСС.
Гувернерот додаде дека руските банки и компании наоѓаат нови начини за подмирување на прекуграничните плаќања и дека се „многу флексибилни во менувањето на овие методи кога се зголемуваат тешкотиите“. Кога станува збор за приходите од нафтата, Набиулина рече дека поради растот на цената на нафтата, извозот закрепнал по падот на почетокот на годината.
Руската економија остана отпорна две години по почетокот на војната во Украина под најстрогите трговски санкции од Западот. Москва беше во можност да го направи тоа во голема мера благодарение на насочувањето на својот извоз на алтернативен пазар, првенствено во Индија и Кина.
Во меѓувреме, некои кинески банкарски гиганти веќе ги суспендираа плаќањата на санкционираните руски финансиски институции. Главната кинеска банка за руските увозници ги стопираше сите порамнувања со Руската Федерација. Комерцијалната банка Zhejiang Chouzhou ги информирала своите клиенти за ова во февруари, како што пренесуваат руските медиуми.
Иако гореспоменатата банка не е важна кога станува збор за извозот на руска нафта, другите глобални банки кои Русија ги користи за да ги заобиколи санкциите не сакаат да работат со неа поради страв од одмазда на Западот. На индиските клиенти сега им е потешко.
„Ројтерс“ минатата недела објави, повикувајќи се на неименувани извори, дека најголемата индиска компанија „Рилианс“ одбила да испорачува руска нафта на танкери во сопственост на руската државна бродска компанија „Совкомфлот“, која е под санкции на САД.
Американскиот претседател Џо Бајден на крајот на минатата година потпиша декрет за заострување на секундарните санкции против компаниите кои вршат трансакции во интерес на рускиот воено-индустриски комплекс и на тој начин ја поддржуваат војната на Русија против Украина.
Ограничувањата би можеле да вклучуваат финансиски институции кои направиле „значајни трансакции во интерес или во име на кое било лице“ на списоците за санкции на Вашингтон за активности во интерес на руската одбранбена индустрија, се вели во документот.
Според гореспоменатите извори, раководството на индиската компанија Reliance, главен увозник на руската нафта од Урал, побарала да се одбие нови испораки на нафта за танкери во сопственост на Совкомфлот.
