Глобалните цени на храната се вратија во нагорна линија во август по два последователни месеци опаѓање, објави во четвртокот Агенцијата за храна на ОН, ФАО.
Индексот на цените на храната на ФАО, кој ги следи месечните промени во кошницата со пет основни прехранбени производи – млеко, месо, житарици, шеќер и растителни масла – во просек изнесуваше 127,4 поени во август, што е за 3,1 отсто повеќе од јули и дури 32,9 отсто во однос истиот месец во 2020 година. Цените на шеќерот пораснаа за 9,6 проценти минатиот месец во споредба со јули, поради загриженоста за штетата што ја предизвика мразот врз посевите во Бразил, најголемиот извозник на шеќер во светот. Порастот на цените на оваа храна беше ограничен со информации за добри изгледи за производство во Индија и Европската унија, како и пад на цените на суровата нафта и слабеење на бразилската валута, се вели во извештајот објавен на веб – страницата на ФАО.
Растителните масла пораснаа за 6,7 проценти на меѓународниот пазар во август, при што цените на палминото масло се вратија на историско највисоко ниво, поради континуираниот пад на производствениот потенцијал, што резултираше со намалување на залихите во Малезија. Цените на репка и сончогледово масло исто така се зголемија.
Цените на житните култури во август се зголемија во просек за 3,4 проценти во споредба со претходниот месец. Цитатите за пченица забележаа скок од 8,8 проценти поради проектираната послаба жетва во неколку големи земји извознички. Спротивно на тоа, цените на пченката се лизнаа за 0,9 проценти, поради подобрите перспективи за принос во Аргентина, ЕУ и Украина, неутрализирајќи ги намалените прогнози за производство во Бразил и САД. Глобалните цени на оризот останаа во надолна траекторија. Меѓународните цени на месото се зајакнаа малку во извештајниот месец, поддржани од силните кинески набавки на овци и говедско месо и солидната побарувачка за увоз во Источна Азија и Блискиот Исток за месо од живина. Цените на свинското месо паднаа, поради понатамошниот пад на набавките во Кина и слабата домашна побарувачка во Европа. Индексот на цените на млекото благо опадна во август на месечно ниво.
