Хрватската консултантска компанија Апсолон го објави истражувањето Хрватски дигитален индекс (ХДИ), со којшто се опфатени 300 компании во земјата од различни дејности и географски подрачја со цел да се увиди состојбата за дигитална подготвеност на тамошната економија, пренесува Bug.hr.
Истражувањето покажало дека пандемијата имала силно влијание врз работата на компаниите, па дури 41% од испитаниците не работеле во текот на “првиот бран“, меѓу кои 21% како причина ја навеле неможноста да организираат алтернативен начин на работа поради специфичната дејност со којашто се занимаваат. Како најголем проблем поради кризата, 58,5% од компаниите ја наведуваат комуникацијата и соработката со клиентите и добавувачите.
“Студијата за дигитална трансформација за оваа година во Хрватска покажува благо позитивно поместување во однос на оваа трансформација и можностите што ги нуди. Сведочиме на четири позитивни трендови – најчести носители на одговорноста за дигитална трансформација сега се претседателите на управата, поголемиот дел од компаниите сметаат дека дигиталната трансформација нема да го намали бројот на работни места, а компаниите ја разбираат потребата да бидат поагилни и сметаат дека последиците од успешна или неуспешна трансформација ќе ги почувствуваат за помалку од три години“, смета Наташа Чуриќ Мартинчевиќ, претседателка на Управата на Апсолон.
Фото: Pexels
