Во рамки на проектот Купи куќа, купи стан, оваа година, според министерката за финансии, Нина Ангеловска, доделени се 97 станбени кредити во износ од 3,6 милиони евра и доделена субвенција од 1,1 милион евра.
Во последните три месеци, како што се наведува, доделен е 61 кредит, а од вкупниот број на одобрени за оваа година, за млади лица се одобрение 48. Поголемиот дел или 71 од одобрените кредити се однесуваат за купување станови, а остатокот од 26 кредити се за куќи. Од вкупниот број апликанти, 45% се жени, а 55% се мажи. До крајот на оваа година се очекува вкупниот број на доделени кредити, преку проектот, да достигне 150.
Според министерката, средства за овој проект се предвидени и во буџетот за следната година.
Преку проектот, како што се наведува, се овозможуваат овие каматни стапки за одобрување на субвенциониран станбен кредит и тоа: за моделите каде се субвенционира ратата од кредитот од страна на државата, каматната стапка се намали од 3,95% на 2,9%, додека за четвртата и петата година каматната стапка е намалена од 4,44% на 3,9%. И кај моделите каде се субвенционира учеството каматната стапка е намалена од 4,5%+ЕУРИБОР на 4%+ЕУРИБОР.
Има и нови модели, за млади на возраст до и наполнети 35 години. За купување на стан, субвенцијата на месечната рата е зголемена од 50% на 70%. Ова значи дека во првите пет години од исплатата на кредитот 70% од месечната рата ќе плаќа државата, додека корисникот на кредитот ќе плаќа само 30%. Исто така, зголемена е и субвенцијата за моделите каде се субвенционира учеството од 50% на 70%. Ова значи дека доколку корисникот на проектот го искористи овој модел, 70% од учеството од кредитот ќе му го плати државата.
