Цените на акциите пораснаа минатата недела на светските берзи, благодарение на нивната корекција по три недели пад и раст во технолошкиот сектор по подобрите од очекуваните деловни резултати на производителот на чипови Nvidia.
Dow Jones изгуби 0,45 отсто минатата недела, на 34.346 поени, но S&P 500 порасна за 0,8 отсто, на 4.405 поени, а индексот Nasdaq 2,25 отсто, на 13.590 поени.
Растот на индексот најмногу се должи на корекцијата на цените на акциите по остриот пад во претходните три недели.
Во исто време, технолошкиот сектор забележа најголем раст, бидејќи инвеститорите беа охрабрени од подобрите од очекуваните квартални деловни резултати, како и проценките за идното работење на производителот на чипови Nvidia.
Цената на акцијата на Nvidia порасна за повеќе од 220 отсто од почетокот на годината, благодарение на еуфоријата околу развојот на вештачката интелигенција (ВИ).
Nvidia е дел од она што пазарот го нарекува „Magnificent Seven“, која меѓу другите ги вклучува Apple, Microsoft и Tesla и која е најодговорна за силниот раст на индексот S&P 500 оваа година.
Сепак, минатата недела немаше еуфорија на пазарот бидејќи приносите на 10-годишните државни обврзници на САД се приближуваат до највисоките нивоа во последните 16 години, што лошо се одразува на берзата.
Тие приноси растат со недели бидејќи растат стравувањата дека американската централна банка би можела да ги зголеми каматните стапки уште еднаш до крајот на годината.
Цените на акциите пораснаа и на европските берзи минатата недела. Лондонски FTSE индекс зајакна за 1 отсто, на 7.338 поени, додека франкфуртски DAX порасна за 0,4 отсто, на 15.631 поен, а париски CAC 0,9 отсто, на 7.220 поени.
