Најголемиот швајцарски произведувач на часовници, Swatch, за една милијарда долари ја купува ексклузивната канадска компанија Harry Winston, која се занимава со производство на часовници и накит.
Swatch ќе плати 750 милиони долари за компанијата Harry Winston Diamond Corp со седиште во Торонто и ќе го преземе долгот од 250 милиони американски долари. Swatch ќе го преземе и седиштето на канадската компанија во Женева и преку 500-те вработени ширум светот.
За Swatch овој договор е одлична можност да се пополни јазот во бизнисот откако во 2011 пропадна договорот за партнерство со Tiffany & Co.
Во оваа трансакција не спаѓаат истражувањата во потрага по дијаманти. Harry Winston соопштија дека по продажбата на своите операции на Swatch, ќе се посветат на бизнисот на ископување на дијаманти и ќе се преименуваат во Dominion Diamond Corp.
Harry Winston и Swatch ќе продолжат и понатаму да соработуваат, затоа што швајцарската компанија е еден од најголемите светски купувачи на брусени дијаманти.
