Американската агенција за безбедност во сообраќајот отвори истрага за откажувањето на мултимедијалниот систем на Tesla во некои примероци на Model S.
Најголемиот проблем, кој може да се покаже како голема грешка за американскиот производител на електрични автомобили, е тоа што речиси сите функции и физички команди во автомобилот ги смести на екранот чувствителен на допир кој е дел од инфозабавниот систем. Американската агенција за безбедност во сообраќајот (NHTSA) отвори официјална истрага откако прими неколку обвинувања и жалби за откажување на овој систем на 11 примероци на Model S произведени меѓу 2013 и 2015 година. Според наводите, во случај да се потврди дека нешто не е во ред со централниот екран, односно инфозабавниот систем, во потенцијална опасност се сопствениците на околу 63.000 Tesla Model S автомобили.
Инаку, во срцето на овој систем се наоѓа Nvidia Tegra 3 микропроцесор со интегрирана eMMC NAND флеш меморија од 8 гигабајти. Станува збор за меморија која има ограничен животен век во зависност од бројот на работни циклуси на програмот. Првите знаци дека овој уред е пред откажување, меѓу останатото, се продолженото време потребно за негово вклучување, како и повременото губење на навигацијата во возилото.
Истата флеш меморија е и во Model X
Доколку управувачката единица на мултимедијалниот систем откаже во целост, се губат сите негови функции, вклучително и навигацијата, можноста за пребарување на интернет, прикажување на помошните камери за возење наназад. Како што се наведува, дефектот на оваа единица може да доведе и до проблеми со контролата на клима-уредот, но и до неможност за максимално полнење на погонската батерија при полнење со електрична енергија.
Во една од тужбите до NHTSA, еден сопственик на спорниот Model S се пожалил дека по откажувањето на уредот не можел да ги одмагли стаклените површини бидејќи не можел да пристапи до командите од клима-уредот. Во друга жалба, сопственик тврди дека од иста причина бил оневозможен да ги контролира функциите поврзани со Tesla автопилотот, што е потенцијално најопасниот проблем од сите наведени.
NHTSA соопшти дека Tesla спорната флеш меморија освен во Model S (2012-2018) ја вградувал и во Model X (2016-2018), но овој електричен кросовер засега не е опфатен со нивната истрага.
Преземено од Avtoplus.mk
