Русија не исклучува уште посилен раст на цената на нафтата до крајот на годината, иако се ќе зависи од рамнотежата меѓу понудата и побарувачката, изјави рускиот вицепремиер Александар Новак на маргините на Меѓународниот економски форум во Санкт Петербург.
Тој додаде дека Русија сè уште се надева дека глобалната побарувачка за нафта ќе се зголеми, и покрај постојаната неизвесност во врска со можните мерки за заклучување во Кина поврзани со Ковид-19, пренесува Тасс.
„Постојат различни прогнози… особено што укажуваат на понатамошен раст ( на цените на нафтата). Се зависи од рамнотежата помеѓу понудата и побарувачката. Се надевам дека побарувачката ќе продолжи да закрепнува во текот на годината како што е планирано, иако постојат одредени ризици поврзани со блокадите во Кина, па останува да се види како ќе се развиваат глобалната економија и потрошувачката“, рече Новак.
Од 15 до 18 јуни се одржува Меѓународниот економски форум во Санкт Петербург, во организација на Фондацијата „Росконгрес“.
Овогодинешниот јубилеј, (25) на Меѓународниот економски форум, носи наслов: „Нови можности во новиот свет“. На собирот присуствуваат официјални лица и бизнисмени од повеќе од 120 земји, вклучувајќи ги, според Тасс, оние „од не многу пријателски земји“ како што се САД, Обединетото Кралство, Франција, Италија, Германија и Холандија.
На форумот денеска ќе присуствува и рускиот претседател Владимир Путин.
