На светските берзи цените на нафтата пораснаа минатата недела, трет пат по ред, и достигнаа нови највисоки нивоа во повеќе од 10 месеци, бидејќи најголемите светски производители решија да го задржат намаленото производство на „црното злато“.
На лондонскиот пазар цената на барелот минатата недела порасна за 3,6 отсто, на 93,93 долари, што е ново највисоко ниво од ноември минатата година. На американскиот пазар, пак, цената на барелот се зголеми за 3,7 отсто, на 90,77 долари, исто така ново највисоко ниво во последните 10 месеци.
Растот на цените трета недела по ред е последица на одлуките на Саудиска Арабија и Русија за намалување на производството. Овие водечки извозници ќе ги намалат испораките до крајот на оваа година за вкупно 1,3 милиони барели дневно.
Организацијата на земјите извознички на нафта и нејзините сојузници веќе го одложија рокот за договор за намалување на понудата до крајот на следната година. Со намалување на производството, тие земји се обидуваат да одржат зголемени цени на нафтата, имајќи предвид дека побарувачката слабее поради забавувањето на растот на најголемите светски економии.
Цените минатата недела беа поддржани од новите макроекономски показатели од Кина, најголемиот увозник на нафта во светот. Во август, индустриското производство и продажбата на мало пораснаа повеќе од очекуваното, поттикнувајќи ги надежите дека закрепнувањето на втората по големина светска економија, а со тоа и побарувачката за нафта, се забрзува.
На цената на нафтата позитивно влијае и шпекулациите дека американската централна банка повеќе нема да ги зголемува каматните стапки и дека тамошната економија ќе избегне рецесија.
Можно е и Европската централна банка да го заврши циклусот на зголемување на каматните стапки. Тоа значи дека по долгорочно забавување, растот на американската и на еврозоната би можел да се стабилизира. А тоа би довело до стабилизирање на побарувачката за „црното злато“.
По растот три недели по ред, цените на нафтата ги продолжија годишните добивки. На лондонскиот пазар во однос на почетокот на годината цената на барелот е поскапа за околу 9,5 отсто, а на американскиот пазар за околу 13 отсто.
