Највисоката исплатена бруто плата во Македонија лани достигна вредност од 167.786.446 денари или 2,7 милиони евра, покажуваат податоците на Управата за јавни приходи. Оваа плата е исплатена во приватното здравство, додека највисокиот бонус од работен однос на годишно ниво е 416.000 евра, јавува Миа.
Граѓанин од Скопје минатата година пријавил највисок годишен приход од 255 милиони денари. Највисоката остварена капитална добивка во 2016 година изнесувала 82,8 милиони денари, а досега највисока таква добивка е пријавена во 2008 година и изнесувала 908.995.813 денари. Од повремено вршење услуги жител на Велес заработил 58,3 милиони денари, додека граѓанин од Скопје пријавил заработка од 109,1 милион денари од дивиденди и други приходи остварени од учеството во добивката.
Пензионери од Скопје и од Струмица пријавиле најголема заработувачка во 2016 година кои освен пензијата оствариле приходи и по други основи. Прворангиран е пензионер од Струмица кој пријавил 41,8 милиони денари вкупен годишен бруто приход по сите основи вклучувајќи ја и пензијата. Највисок годишен бруто приход само по основ на пензија лани е пријавен во Скопје во износ од 1.838.837 денари или 30.000 евра.
Прворангиран според вкупно остварени приходи од имот и имотни права во коишто спаѓаат издавање земјиште, станови и деловни простории, превозни средства и друг вид имот, во 2016 година е обврзник од Тетово кој пријавил 65,5 милиони денари. Највисок вкупен бруто приход од 17,3 милиони денари од авторски права и права од индустриска сопственост пријавил обврзник од Скопје. Од милион до 27 милиони денари се износите што ги пријавувале граѓаните од добивки од Лото, обложување, казино и учество во наградни игри, при што највисока добивка односно вкупен бруто приход од игри на среќа остварил жител на Скопје кој само по тој основ пријавил 27,5 милиони денари.
