Усвоена нова дополнителна субвенција од пет денари за килограм предадена оризова арпа

31

Фото: Pixabay

Владата донесе одлука за воведување на нова интервентна мерка за земјоделците производители на ориз, стои во соопштението.

Конкретно, земјоделците ќе добијат пет денари за килограм произведена и предадена оризова арпа во регистрирани откупувачи. Владата ја донесе оваа одлука поради нарушениот баланс помеѓу понудата и побарувачката и многу ниската откупна цена. Со оваа нова дополнителна субвенција ќе се поттикне договорениот откуп на оризова арпа од реколтата 2018 година, од што бенефит ќе имаат и земјоделците. Субвенцијата се однесува за количините кои се произведени и предадени во период од први октомври до 25-ти декември 2018 година и кои не надминуваат 5,5 тони по хектар.

“Со новата мерка се очекува да бидат субвенционирани околу 5.000 тони оризова арпа во висина од пет денари по килограм, поради што се очекува поддршката за оваа мерка да изнесува околу 25 милиони денари или 400.000 евра. Субвенциите ќе бидат исплатени од Програмата за финансиска поддршка во земјоделството за 2019 година“, изјави министерот за земјоделство, шумарство и водостопанство, Љупчо Николовски.

Истовремено на оризопроизводителите им стојат на располагање мерките од Програмата за финансиска поддршка во земјоделството. Односно, оваа година субвенцијата со користење на сертифициран семенски материјал е 12.000 денари по хектар, за без семенски материјал е 6.000 денари. Но, со годинешната Програма, за 20% ја зголемивме субвенцијата за растително производство вклучително и за оризот за земјоделците со развоен капацитет. Конкретно, за оние кои имаат површини од пет до 50 хектари, субвенцијата изнесува 14.400 денари по хектар за користен сертифициран семенски материјал и 7.200 денари за без семенски материјал. Го зголемивме и скалестото рангирање од минимум 10 хектари на 20 хектари за исплата на 100% од субвенцијата. Дополнително, доколку се користи семенски сертифициран ориз се добиваат 3.000 денари по хектар.