Зголемениот јаз меѓу богатите и сиромашните во светот ќе ја зацврсти сиромаштијата и ќе го зголеми ризикот од „климатски колапс“, според повеќе од 200 водечки економисти.
Во писмото до генералниот секретар на Обединетите нации, Антонио Гутереш и претседателот на Светската банка, Аџај Банга, тие ги повикаа двете организации да направат повеќе за да го поништат најостриот пораст на глобалната нееднаквост од Втората светска војна, пишува Гардијан.
Меѓу потписниците се поранешниот генерален секретар на ОН Бан Ки-мун, поранешната премиерка на Нов Зеланд Хелен Кларк и економистите Џајати Гош, Џозеф Стиглиц и Томас Пикети. Во писмото се повикува на итна акција по различното влијание на пандемијата на корона вирусот врз богатите и сиромашните.
Се додава дека растечката нееднаквост е „во голема мера игнорирана“, како и концентрацијата на приходите и богатството меѓу супербогатите.
– Живееме во време на исклучително висока економска нееднаквост. Екстремната сиромаштија и екстремното богатство се зголемија до небо. Помеѓу 2019 и 2020 година, глобалната нееднаквост растеше побрзо од кога било од Втората светска војна, се вели во писмото.
Се вели дека ОН и Светската банка имаат единствена можност да понудат повик за намалување на нееднаквоста што „нашиот поделен свет толку итно му треба“. Според потписниците на писмото, најбогатите 10 отсто од светското население во моментов земаат 52 отсто од глобалниот приход, додека најсиромашната половина од населението заработува 8,5 отсто од него.
– Милијарди луѓе се борат со високите и растечки цени на храната и гладот, додека бројот на милијардери е двојно зголемен во последната деценија – велат експерти од целиот свет.
Се додава дека високата стапка на нееднаквост „ги поткопува сите наши социјални и еколошки цели“.
– Ја еродира нашата политика, ја уништува довербата, го попречува нашиот економски просперитет и го ослабува мултилатерализмот. Знаеме и дека без нагло намалување на нееднаквоста, целите за ставање крај на сиромаштијата и спречување на климатскиот колапс ќе бидат во јасен конфликт, се наведува во писмото.
Светска банка соопшти дека денес неприфатливо е изразена нееднаквост во светот бидејќи најсиромашните продолжуваат да ги сносат најголемите трошоци од пандемијата и нејзините последици.
– Светска банка е посветена на решавање на нееднаквоста во сите нејзини облици. Се согласуваме дека треба да направиме повеќе за да се справиме со нееднаквоста и подобро да го мериме напредокот. Идеите предложени во отвореното писмо се добредојден придонес во оваа дискусија – рече портпаролот на Светска банка.
