Побарувачката за приватни чартер летови од регионот на Блискиот Исток е нагло зголемена од почетокот на војната меѓу САД и Израел против Иран, а оние што имаат доволно пари плаќаат екстремно високи цени за да го напуштат регионот.
Застојот, кој започна на 28 февруари, предизвика најголемо нарушување на воздушниот сообраќај во регионот на Заливот од пандемијата Ковид-19. Поради затворањето на воздушниот простор поради напади со ракети и беспилотни летала, редовните летови на многу авиокомпании се сериозно нарушени.
Претседателот и основач на компанијата за приватни авиони AirX, Џон Метјуз, за CNN изјави дека интересот за чартер летови значително се зголемил во последните денови, бидејќи распоредите на комерцијалните летови во делови од регионот станале ограничени или несигурни.
Десетици илјади патници останале заглавени, и иако некои авиокомпании почнале да враќаат мал број рути, најбогатите патници наоѓаат решение со изнајмување приватни авиони. Според Метјуз, барањата доаѓаат од ултрабогати семејства, мултинационални компании кои ги преместуваат своите раководители, како и поголеми групи како што се спортски тимови или групи кои треба да патуваат заедно.
SHY Aviation соопшти дека обично имало помеѓу десет и петнаесет приватни летови дневно од градови како што се Мускат, Дубаи и Ријад, но минатата недела тој број се зголемил на повеќе од 90 дневно.
Големата побарувачка, ограничениот број авиони и повисоките трошоци за осигурување доведоа до силен пораст на цените. Покрај тоа, во повеќето случаи, авионите се враќаат празни во регионот, па клиентите практично плаќаат во двата правци.
Така, група од 12 лица и едно куче платиле околу 145.000 долари за петчасовен лет од Мускат до Истанбул. Пред почетокот на конфликтот, истиот лет би чинел околу 60.000 долари, што значи зголемување на цената од околу 142 проценти.
На почетокот на конфликтот, аеродромите во Мускат и Ријад биле најкористени, но подоцна Дубаи станал попопуларен бидејќи емиратот е дом на многу луѓе кои се обидуваат да го напуштат регионот. Најчеста дестинација е Истанбул поради неговата близина, а други дестинации вклучуваат Атина и Мумбаи.
Сепак, приватните летови не можат значително да ја ублажат кризата во воздушниот транспорт бидејќи се многу скапи и бидејќи има малку достапни авиони. Метјуз истакнува дека приватниот чартер не може да го замени обемот на комерцијалните авиокомпании, но може да им овозможи на организациите и групите брзо да се префрлат кога редовните летови се прекинати.
Тој додаде дека минатата недела неговата компанија склучила договор за чартер авион вреден околу еден милион евра за авион со сто седишта што можат да се претворат во кревети. Сепак, влијанието на приватните летови врз пошироката криза е ограничено бидејќи еден авион во просек превезува околу 12 патници, а во регионот се достапни само 40 до 50 вакви авиони.