Планираните вкупни приходи од оперативното работење на друштвото се позиционирани на износ од приближно 52.150.000 евра. Од вака планираните вкупни приходи, 60% се планирани да се остварат на домашниот, а 40% на странски пазари, стои во Финансискиот и бизнис план за 2019 година, објавен на Македонска берза.
Како приоритети на продажбата, како што се наведува, се зголемување на продажбата на домашниот и на пазарите на балканските земји.
Имајќи ја предвид среднорочната стратегија за развој на друштвото и во 2019 година продолжува со инвестирање со цел следење на развојните процеси. Основно инвестициите се однесуваат на модернизирање и автоматизирање на техничко-технолошките процеси, зголемување на постоечките капацитети, воведување на нови производни линии, градежна реконструкција и адаптација на производни хали и магацини за складирање.
Остварувањето на финансискиот план ќе ја зголеми добивката на компанијата за 15 до 20%.
