Прилепска Витаминка со изложување на дел од широката палета сопствени производи се претстави пред еден од светски највлијателните саеми на кондиторски производи, саемот China-CEEC Expo за инвестиции и трговија со храна.
„Фактот што бевме дел од овој саем значи дека го добивме и признанието за квалитет на нашите производи кои ги задоволуваат високите стандарди во Централна и Источна Европа. Саемот China-CEEC Expo е еден од водечките саеми воопшто заради големиот број учесници, но и заради тоа што во фокусот има инвестиции и трговија, а не само изложување и затоа претставува исклучителна можност за сите присутни. Големиот број изложувачи, увозници и посетители, ни даде одлична можност за презентирање на нашите производи, зацврстување на веќе воспоставените бизнис врски, но во исто време и можност за иницијални контакти со потенцијални соработници и истражување на условите за проширување на пласманот на производите и остварување на планираните стратешки и бизнис планови“, изјави Љупчо Велески, директор за извоз во Витаминка.
На саемот во Нингбо, Кина, освен Витаминка, се претставија и светски познати и реномирани компании од 16 земји од Централна и Источна Европа.
China-CEECExpo изложбениот саем беше организиран од Министерството за Комерција на Кина и претставува првата сеопфатна инвестициско – трговска платформа која се воспоставува помеѓу Кина и земјите од Централна и Источна Европа (CEEC).
