Volkswagen, Škoda и Seat ќе се разликуваат само во дизајнот

31

Брендовите во рамките на групацијата Volkswagen ќе споделуваат сè поголем број делови со цел да заработат поголем профит од подостапните автомобили што се нудат, рече Томас Шефер, извршен директор на производството на VW. Ова во основа значи дека моделите на Volkswagen, Seat и Skoda ќе се разликуваат само во нивниот индивидуален дизајн, додека тие ќе ја делат платформата, како и речиси сите хардверски и софтверски компоненти.

Со цел да се направи разлика помеѓу трите марки, Volkswagen Group ќе го нагласи индивидуалниот дизајн на секој модел. Компанијата долго време се бореше да ја задржи комплексноста на повеќе опции за опрема и варијанти на мотори во својата широка палета, од најевтиниот Škoda Fabia до SUV моделот Volkswagen Touareg.

„Порано поминувавме премногу време преокупирани еден со друг. Конкуренцијата е надвор, не внатре во компанијата“, изјави Шефер.

Томас Шефер стана првиот човек на марката Volkswagen на 1 јули, кога го презеде и управувањето со други брендови во рамките на групата кои се занимаваат со масовно производство на автомобили.

Шефер е свесен за ривалите како Tesla и Stellantis, па затоа е решен Volkswagen, Škoda и Seat да работат заедно за да постигнат поголема профитабилност. Првичните планови се однесуваат на споделување на фабриките како и развој на соработка во текот на производството и развојот.

Првиот чекор е да се префрли производството на следната генерација на Volkswagen Passat од Германија во Словачка, каде ќе се произведува и сестринскиот модел Škoda Superb, кој моментално се склопува во Чешка.