На Волстрит, индексот S&P 500 и Nasdaq индексот паднаа во средата, откако лидерите на американската централна банка ги оставија каматните стапки непроменети, бидејќи оваа година нема напредок во намалувањето на инфлацијата.
Dow Jones зајакна 0,23 отсто, на 37.903 поени, додека S&P 500 се лизна за 0,34 отсто, на 5.018 поени, а индексот Nasdaq 0,33 отсто, на 15.605 поени.
По дводневна седница, челниците на ФЕД вчера одлучија да ги остават основните каматни стапки непроменети во опсег од 5,25 до 5,50 отсто бидејќи, како што велат во соопштението, нема натамошен напредок по прашањето на инфлацијата.
Индексите значително пораснаа во еден момент, откако претседателот на ФЕД Џером Пауел на прес-конференција рече дека е малку веројатно натамошно зголемување на каматните стапки.
Сепак, индексите набрзо ги загубија тие добивки бидејќи и онака никој долго време не ја спомнуваше можноста за дополнително зголемување на каматните стапки.
А што се однесува до намалувањето на каматните стапки, сè помалку е веројатно дека ФЕД ќе се одлучи за такво нешто пред есен.
Од почетокот на годината, берзанските индекси на најголемата светска берза силно пораснаа врз основа на очекувањата дека ФЕД агресивно ќе ги намали каматните стапки оваа година, најдоцна од јуни.
Сепак, бидејќи стана јасно дека станува збор за преоптимистички очекувања, индексите значително паднаа во април.
Освен ФЕД, во фокусот на инвеститорите деновиве се и кварталните деловни резултати на компаниите.
Досега, околу 310 компании од индексот S&P 500 објавија резултати, при што 77 отсто пријавиле поголема заработка од очекуваната.
Затоа аналитичарите во истражувањето на Ројтерс сега проценуваат дека заработката на компанијата во првиот квартал е зголемена за 6,6 отсто во однос на истиот период минатата година, додека пред еден месец се очекуваше раст на заработката од 5,1 отсто.
