На Волстрит повеќедневниот раст на берзанските индекси беше прекинат во четвртокот, откако претседателот на ФЕД Џером Пауел изјави дека инфлацијата е сè уште висока и дека централната банка може дополнително да ја заостри монетарната политика.
Dow Jones загуби 0,65 отсто, на 33.891 поен, додека S&P 500 се лизна за 0,81 отсто, на 4.347 поени, а индексот Nasdaq загуби 0,94 отсто, на 13.521 поен.
По осум дена раст, индексот S&P 500 вчера падна бидејќи инвеститорите беа поколебани од претседателот на ФЕД Џером Пауел, кој рече дека е можно дополнително заострување на монетарната политика.
На состанокот на Меѓународниот монетарен фонд Пауел изјави дека е задоволен од слабеењето на инфлацијата, но дека не е сигурен дека ФЕД направил доволно.
По говорот на Пауел паѓаат индексите
„ФЕД е решен да постави доволно рестриктивна монетарна политика за да ја сведе инфлацијата на целното ниво. Сè уште не сум сигурен дека сме го постигнале тоа“, изјави Пауел.
До говорот на Пауел, индексите стагнираа, а потоа паднаа.
На почетокот на ноември, Волстрит силно порасна, благодарение на верувањето на инвеститорите дека американската централна банка го завршила циклусот на зголемување на каматните стапки.
Но, во последните денови тргувањето беше претпазливо затоа што, освен Пауел, многу други претставници на ФЕД изјавија дека е можно уште едно зголемување на каматните стапки, со оглед на тоа што инфлацијата и понатаму е значително повисока од целното ниво на ФЕД од 2 отсто.
И покрај овие пораки, повеќето аналитичари сметаат дека тоа нема да се случи. Но, тие проценуваат дека ФЕД би можел да ги задржи каматните стапки на покачени нивоа подолго од претходно очекуваното.
И на европските берзи вчера поскапеа акциите. Лондонски FTSE индекс зајакна 0,73 отсто, на 7455 поени, додека франкфуртски DAX порасна за 0,81 отсто, на 15.352 поени, а париски CAC 1,13 отсто, на 7113 поени.
